Halkara Bitaraplyk baýramyna bagyşlanan eserler bizi buýsandyrdy
Bu günki gün ajaýyp zamanamyzyň ösüşlerine bagyşlanan eserler dogrusynda söz açylanda, uzak geljekleri nazarlaýan tutumlar, dünýä ýaň salýan täzelikler göwün guşuňy ganatlandyrýar. Sebäbi Gahryman Arkadagymyzyň parasatly baştutanlygynda her bir günümiz buýsançly wakalara beslenýär.2021-nji «Türkmenistan – parahatçylygyň we ynanyşmagyň Watany» ýylynyň 8-nji dekabrynda Halkara Bitaraplyk baýramynyň şanly 26 ýyllyk toýy mynasybetli Türkmenistanyň Suratkeşler birleşigi tarapyndan Türkmenistanyň Medeniýet ministrliginiň sergiler müdirliginiň sergiler jaýynda «Bitaraplyk – buýsanjym» atly ýurdumyzyň ussat we zehinli suratkeşleriniň, heýkeltaraşlarynyň hem-de amaly-haşam sungatynyň wekilleriniň nakgaşlyk, grafika, heýkeltaraşlyk, amaly-haşam sungatynyň dürli ugurlarynda ýerine ýetirilen 220-den gowrak döredijilik eserleri giňden açylyp görkezildi.«Bitaraplyk – buýsanjym» atly döredijilik sergide M.Kakabaýewiň «Dessanlarda Watan waspy», W.Orazberdiýewiň «Sowgat», Ç.Ýazmyradowyň «Nusaý», A.Annaýewiň «Nar ýygnaýan gyzlar», G.Rozykulyýewanyň «Milli natýurmort», G.Goçmyradowyň «Narly natýurmort», O.Öwezowyň «Almaly-narly natýurmort», B.Bazarowyň «Durnalar», Ş.Ataýewiň «Bagyr obasy», K.Nurmyradowyň «Alabaýly taslama», A.Gulowyň «Mollagaranyň şypaly kenary», M.Gylyjowyň «Günden nur alan günebakarlar» ýaly eserleri sergä gatnaşan tomaşaçylaryň ünsüni çekdi. Sungatyň dürli ugurlarynda ýerine ýetirilen eserlerde bagtyýar nesillerimiziň şatlygy, ýurdumyzyň asudalygy, parahatçylygy, türkmen halkynyň milli mirasy çuň mazmunly pelsepewi seljermesi esasynda beýan edilmegi sungat eserleriniň gymmatyny artdyrdy. Bu ajaýyp sergi Türkmenistanyň Döwlet çeperçilik akademiýasynyň talyp ýaşlary üçin örän täsirli boldy. Şekillendiriş sungatyny ösdürjek talyp ýaşlarymyzyň bu sergide ýurdumyzyň ussat suratkeşleriniň döredijiligi bilen ýakyndan tanşyp olar bilen söhbetdeş bolmagy, ýaş uçgunlaryň döredijilik gözlegleriniň kämilleşmegine uly itergi boljakdygy şübhesizdir.Ýurdumyzyň suratkeşleri hormatly Prezidentimiziň alyp barýan parasatly syýasatyna daýanyp, Watan asudalygy, parahatçylygy, dünýä halklary bilen dost-doganlyk ýörelgeleri özleriniň eserlerinde beýan edip başardylar. Bu bolsa türkmeniň bagtyýarlyk zamanasynyň täze sungat taryhynyň ajaýyp sahypasyny döredýändigini kepillendirýär.
Bilbil Çaryýewa,
Türkmenistanyň Döwlet çeperçilik akademiýasynyň
uly ylmy işgäri
